ഷിഫാന ഷെറിൻ പി.കെ. (BA Multimedia 4th Semester)
കോട്ടക്കൽ: നൂറ്റാണ്ടിലേറെ നീളുന്ന പൈതൃകവുമായി ആയുർവേദ വിദ്യാഭ്യാസ രംഗത്ത് പ്രവർത്തിക്കുന്ന പ്രമുഖ സ്ഥാപനമാണ് കോട്ടക്കലിലെ വൈദ്യരത്നം പി.എസ്. വാര്യർ ആയുർവേദ കോളേജ്. ആയുർവേദ വിദ്യാഭ്യാസവും ആശുപത്രി അധിഷ്ഠിത പ്രായോഗിക പരിശീലനവും സമന്വയിപ്പിച്ചാണ് സ്ഥാപനം പ്രവർത്തിക്കുന്നത്. ആയുർവേദ രംഗത്തെ പ്രമുഖനായ വൈദ്യരത്നം പി.എസ്. വാര്യരാണ് സ്ഥാപനത്തിന്റെ രൂപീകരണത്തിന് നേതൃത്വം നൽകിയത്. 1917-ൽ കോഴിക്കോട് ‘ആര്യ വൈദ്യ പാഠശാല’ എന്ന പേരിലാണ് സ്ഥാപനത്തിന്റെ പ്രവർത്തനം ആരംഭിച്ചത്. ആര്യ വൈദ്യ സമാജത്തിന്റെ കീഴിലായിരുന്നു ആദ്യകാല പ്രവർത്തനം. കോഴിക്കോട് നിന്ന് കോട്ടക്കലിലേക്ക് വിദ്യാർത്ഥികൾക്ക് കൂടുതൽ പ്രായോഗിക പരിശീലനം ലഭ്യമാക്കുക എന്ന ലക്ഷ്യത്തോടെ 1924-ൽ പാഠശാല കോട്ടക്കലിലേക്ക് മാറ്റി. തുടർന്ന് ആര്യ വൈദ്യശാലയുടെ ചാരിറ്റബിൾ ആശുപത്രിയുമായി സഹകരിച്ച് വിദ്യാർത്ഥികൾക്ക് ക്ലിനിക്കൽ പരിശീലനം നൽകുന്നതിനുള്ള സംവിധാനവും ആരംഭിച്ചു. ആദ്യഘട്ടത്തിൽ ഡിപ്ലോമ കോഴ്സുകളായിരുന്നു പ്രധാനമായും ഉണ്ടായിരുന്നത്. 1958-ൽ ‘ആര്യ വൈദ്യൻ’ ഡിപ്ലോമ കോഴ്സ് അവസാനിപ്പിച്ച് ഡിപ്ലോമ ഇൻ ആയുർവേദിക് മെഡിസിൻ (D.A.M.) ആരംഭിച്ചു. 1959-ൽ പാഠശാല പൂർണമായ ആയുർവേദ കോളേജായി ഉയർത്തപ്പെട്ടു. ബിരുദ വിദ്യാഭ്യാസത്തിലേക്ക് 1972-ൽ കാലിക്കറ്റ് സർവകലാശാലയുമായി അഫിലിയേറ്റ് ചെയ്തതോടെ ബാച്ചിലർ ഓഫ് ആയുർവേദിക് മെഡിസിൻ (B.A.M.) കോഴ്സ് ആരംഭിച്ചു. തുടർന്ന് 1979–80 അധ്യയന വർഷത്തിൽ ബാച്ചിലർ ഓഫ് ആയുർവേദിക് മെഡിസിൻ ആൻഡ് സർജറി (B.A.M.S.) കോഴ്സും ആരംഭിച്ചു. B.A.M.S. കോഴ്സിന് 4½ വർഷത്തെ പഠനകാലയളവിനൊപ്പം ഒരു വർഷത്തെ നിർബന്ധിത ഇന്റേൺഷിപ്പുമാണ് നിലവിലുള്ളത്. 2010 മുതൽ കോളേജിലെ യു.ജി., പി.ജി. കോഴ്സുകൾ കേരള യൂണിവേഴ്സിറ്റി ഓഫ് ഹെൽത്ത് സയൻസസിന്റെ (KUHS) അഫിലിയേഷനിലാണ് നടത്തുന്നത്. യു.ജി., പി.ജി. കോഴ്സുകളിലേക്ക് വിപുലീകരണം നാല് വർഷത്തെ ഡിപ്ലോമ കോഴ്സുകളിൽ നിന്ന് ആരംഭിച്ച സ്ഥാപനം പിന്നീട് ബിരുദ, ബിരുദാനന്തര പഠനങ്ങളിലേക്ക് വ്യാപിച്ചു. നിലവിൽ B.A.M.S. ഉൾപ്പെടെയുള്ള വിവിധ യു.ജി., പി.ജി. കോഴ്സുകൾക്ക് പുറമെ നാല് പി.ജി. ഡിപ്ലോമ കോഴ്സുകളും ഇവിടെ നടത്തിവരുന്നു. ആര്യ വൈദ്യശാലയുമായുള്ള സ്ഥാപനത്തിന്റെ ദീർഘകാല ബന്ധം വിദ്യാർത്ഥികൾക്ക് ആശുപത്രി അധിഷ്ഠിത പരിശീലനം ലഭിക്കുന്നതിനും സഹായകമാണ്. ക്ലിനിക്കൽ പരിശീലനത്തിലൂടെ പഠനത്തോടൊപ്പം പ്രായോഗിക പരിചയവും നേടാൻ വിദ്യാർത്ഥികൾക്ക് അവസരം ലഭിക്കുന്നു. ഭരണസംവിധാനത്തിലും മാറ്റം ആദ്യകാലത്ത് ആര്യ വൈദ്യ സമാജത്തിന്റെ നേതൃത്വത്തിലായിരുന്നു കോളേജിന്റെ പ്രവർത്തനം. 1976 മാർച്ച് 31-ന് സംഘടന പിരിച്ചുവിട്ടതിനെ തുടർന്ന് കോളേജിന്റെ ഭരണ ചുമതല കേരള ആയുർവേദിക് സ്റ്റഡീസ് ആൻഡ് റിസർച്ച് സൊസൈറ്റി (KASRS) ഏറ്റെടുത്തു. സംസ്ഥാന സർക്കാരിന്റെയും ആര്യ വൈദ്യശാലയുടെയും പ്രതിനിധികൾ ഉൾപ്പെടുന്ന ഭരണസംവിധാനമാണ് സൊസൈറ്റിനുള്ളത്. ആരോഗ്യ മന്ത്രി ചെയർമാനായാണ് ഗവണിംഗ് ബോഡി പ്രവർത്തിക്കുന്നത്. സർക്കാർ, ആര്യ വൈദ്യശാല പ്രതിനിധികൾ ഉൾപ്പെടുന്ന എക്സിക്യൂട്ടീവ് കമ്മിറ്റിയും സ്ഥാപനത്തിന്റെ ഭരണത്തിൽ പങ്കാളിയാണ്. കോളേജിന്റെ ദൈനംദിന പ്രവർത്തനങ്ങൾക്ക് എക്സിക്യൂട്ടീവ് ഡയറക്ടറും സി.ഇ.ഒയും നേതൃത്വം നൽകുന്നു. പൈതൃകത്തിൽ നിന്ന് ആധുനിക വിദ്യാഭ്യാസത്തിലേക്ക് 1917-ൽ കോഴിക്കോട് ആരംഭിച്ച ആര്യ വൈദ്യ പാഠശാലയിൽ നിന്ന് കോട്ടക്കലിലെ ആയുർവേദ കോളേജിലേക്കുള്ള വളർച്ച ഒരു നൂറ്റാണ്ടിലേറെ നീണ്ട വിദ്യാഭ്യാസ പാരമ്പര്യത്തിന്റെ ഭാഗമാണ്. ആയുർവേദത്തിലെ പരമ്പരാഗത വിജ്ഞാനത്തോടൊപ്പം സർവകലാശാലാ അധിഷ്ഠിത ബിരുദ, ബിരുദാനന്തര വിദ്യാഭ്യാസവും ആശുപത്രി കേന്ദ്രീകൃത പ്രായോഗിക പരിശീലനവും സംയോജിപ്പിച്ചാണ് കോളേജ് നിലവിൽ പ്രവർത്തിക്കുന്നത്. കോട്ടക്കലിന്റെ ആയുർവേദ പൈതൃകത്തിന്റെ ഭാഗമായ ഈ സ്ഥാപനം കാലാനുസൃതമായ അക്കാദമിക് സംവിധാനങ്ങളിലൂടെ ആയുർവേദ വിദ്യാഭ്യാസ രംഗത്തെ പ്രവർത്തനം തുടരുകയാണ്.
