പൊന്നാനി ജുമാ മസ്ജിദ്: മലബാറിന്റെ ചെറിയ മക്കയുടെ നൂറാണ്ടുകളുടെ നൂർ

Nouha ayisha Kv (BAmultimedia 4th sem)

അല്ലാഹുവിന്റെ ഭവനങ്ങളിൽ ചിലത് നമസ്കാരത്തിനുള്ള കേന്ദ്രങ്ങൾ മാത്രമല്ല. അറിവിന്റെയും ആത്മീയതയുടെയും ചരിത്രത്തിന്റെയും മഹത്വചിഹ്നങ്ങളായി നിലകൊള്ളുന്നവയാണ്. അത്തരത്തിൽ കേരള മുസ്ലിം സമൂഹത്തിന്റെ അഭിമാനമായി നിലകൊള്ളുന്ന മഹത്തായ മസ്ജിദാണ് മലപ്പുറം ജില്ലയിലെ പൊന്നാനിയിൽ സ്ഥിതി ചെയ്യുന്ന പൊന്നാനി ജുമാ മസ്ജിദ്. പൊന്നാനി വലിയ ജുമാഅത്ത് പള്ളി എന്ന പേരിലും ഇത് അറിയപ്പെടുന്നു.

ഒരുകാലത്ത് പൊന്നാനി “മലബാറിന്റെ ചെറിയ മക്ക” എന്ന പേരിൽ പ്രസിദ്ധമായിരുന്നു. ആ മഹത്വത്തിന് പ്രധാന കാരണമായിരുന്നു ഈ ജുമാ മസ്ജിദ്. ദൂരദേശങ്ങളിൽ നിന്നു പോലും അറിവ് തേടി ആളുകൾ ഇവിടെ എത്തിയിരുന്നു. ദീനി വിജ്ഞാനത്തിന്റെ പ്രകാശം പരന്നിരുന്നത് ഈ പള്ളിയിലൂടെയായിരുന്നു.

ചരിത്രത്തിൽ രേഖപ്പെടുത്തിയിരിക്കുന്നതുപോലെ മഹാനായ ഷെയ്ഖ് സൈനുദ്ദീൻ മഖ്ദൂം (റഹ്) ആണ് ഈ മസ്ജിദ് നിർമിച്ചതായി വിശ്വസിക്കപ്പെടുന്നത്. കേരളത്തിന്റെ തനത് ഇസ്ലാമിക ശൈലിയിൽ പണിത ഈ മസ്ജിദ് പഴമയും പാരമ്പര്യവും നിറഞ്ഞ മഹത്തായ നിർമ്മിതിയാണ്.

മഖ്ദൂം (റഹ്) ഇവിടെ ഇരുന്ന് ദർസ് നടത്തിയിരുന്നു. അനേകം പണ്ഡിതന്മാർ ഈ പള്ളിയിൽ നിന്ന് സമൂഹത്തിന് ലഭിച്ചു. മസ്ജിദിനകത്ത് തെളിഞ്ഞിരുന്ന എണ്ണവിളക്കിന് ചുറ്റുമായി ഇരുന്ന് പഠിച്ചിരുന്ന വിദ്യാർത്ഥികൾ ദീനിന്റെ പ്രകാശം ഏറ്റുവാങ്ങി സമൂഹത്തിലേക്ക് മടങ്ങിയിരുന്നു. “തിരിവിളക്കിന് മുമ്പിൽ ഇരിക്കൽ” എന്നറിയപ്പെട്ടിരുന്ന ഈ സമ്പ്രദായം പഴയകാല ഇസ്ലാമിക വിദ്യാഭ്യാസത്തിന്റെ മഹത്തായ അടയാളമാണ്.

മലബാറിന്റെ പല ഭാഗങ്ങളിൽ നിന്നായി നൂറുകണക്കിന് വിദ്യാർത്ഥികൾ ഇവിടെ എത്തി പഠനം നടത്തി. പള്ളി പരിസരത്ത് പ്രവർത്തിച്ചിരുന്ന മദ്റസയും വലിയ വിജ്ഞാനകേന്ദ്രമായിരുന്നു. പൊന്നാനിയുടെ പേര് ലോകത്തിന് പരിചയപ്പെടുത്തിയത് ഈ അറിവിന്റെ പാരമ്പര്യമാണ്.

ഈ മസ്ജിദുമായി ബന്ധമുള്ള മഹാന്മാരിൽ ഉമർ ഖാസി (റഹ്), മമ്പുറം തങ്ങൾ (റഹ്), കുഞ്ചയൻ മുസ്ലിയാർ (റഹ്) തുടങ്ങിയവർ ഉൾപ്പെടുന്നു. അവരുടെ ജീവിതവും സേവനവും ഈ പള്ളിയുടെ മഹത്വം വർധിപ്പിച്ചു.

പ്രിയരേ… ഇന്നും പൊന്നാനി ജുമാ മസ്ജിദ് നൂറ്റാണ്ടുകളുടെ ചരിത്രം പറഞ്ഞുകൊണ്ട് നിലകൊള്ളുന്നു. നമസ്കാരത്തിന്റെ ഭവനമെന്നതിലുപരി ഇമാനിന്റെയും അറിവിന്റെയും ത്യാഗത്തിന്റെയും ഒരു പ്രകാശസ്തംഭമാണ് ഇത്. അത്തരമൊരു പൈതൃകം സംരക്ഷിക്കുകയും ആദരിക്കുകയും ചെയ്യുന്നത് നമ്മുടെ ബാധ്യതയാണ്.