Mubeena Mk (4th semester BA Multimedia )
വേങ്ങര: മിനി ഊട്ടി (അരിംബ്ര ഹിൽസ്) പ്രദേശത്ത് വിനോദസഞ്ചാരികളുടെ തിരക്ക് കഴിഞ്ഞ കുറച്ച് മാസങ്ങളായി ഗണ്യമായി വർധിച്ചിരിക്കുകയാണ്. വേങ്ങരയ്ക്കും കൊണ്ടോട്ടിക്കുമിടയിൽ സ്ഥിതിചെയ്യുന്ന ഈ കുന്നിൻപ്രദേശം, തണുപ്പുള്ള കാലാവസ്ഥയും മഞ്ഞുമൂടിയ പ്രകൃതിദൃശ്യങ്ങളും കൊണ്ടാണ് ‘മിനി ഊട്ടി’ എന്ന പേരിൽ പ്രശസ്തമായത്.
പ്രത്യേകിച്ച് രാവിലെ സമയങ്ങളിലും വൈകുന്നേരങ്ങളിലും, സൂര്യോദയവും സൂര്യാസ്തമയവും കാണുന്നതിനായി നിരവധി ആളുകൾ ഇവിടെ എത്തുന്നുണ്ട്. അവധി ദിവസങ്ങളിലും ഞായറാഴ്ച്ചകളിലും വലിയ തിരക്കാണ് അനുഭവപ്പെടുന്നത്. സമീപ ജില്ലകളിൽ നിന്നു പോലും വിനോദസഞ്ചാരികൾ ഇവിടെ എത്തുന്നുണ്ടെന്നാണ് റിപ്പോർട്ടുകൾ.
ഇവിടുത്തെ ഏറ്റവും വലിയ സവിശേഷത അടുത്തിടെ തുറന്ന ഗ്ലാസ് ബ്രിഡ്ജാണ്. മലനിരയുടെ അറ്റത്ത് നിന്നും താഴ്വരയിലേക്ക് തള്ളിനിൽക്കുന്ന ഈ ഗ്ലാസ് പാലത്തിലൂടെയുള്ള നടത്തം ഏതൊരു സഞ്ചാരിക്കും ആവേശം നൽകുന്ന ഒന്നാണ്. നൂറുകണക്കിന് അടി താഴ്ചയിലുള്ള പച്ചപ്പും പാറക്കെട്ടുകളും പാദത്തിനടിയിൽ കാണാം എന്നുള്ളതാണ് ഇതിന്റെ പ്രത്യേകത. സാഹസികത ഇഷ്ടപ്പെടുന്ന യുവാക്കൾ മുതൽ കുടുംബമായി എത്തുന്നവർ വരെ ഇന്ന് ഗ്ലാസ് ബ്രിഡ്ജിലെ തിരക്കേറിയ കാഴ്ച്ചയാണ്.
കാഴ്ച്ചകൾ അവിടെയും തീരുന്നില്ല. അരിമ്പ്ര മലയുടെ ഉച്ചിയിൽ നിന്നാൽ കാണുന്ന കാഴ്ച്ചകൾ അതിമനോഹരമാണ്. ചക്രവാളത്തിൽ മുട്ടിനിൽക്കുന്ന മലനിരകൾക്ക് അപ്പുറം, തെളിഞ്ഞ കാലാവസ്ഥയാണെങ്കിൽ കോഴിക്കോട് അന്താരാഷ്ട്ര വിമാനത്താവളത്തിലെ റൺവേയും വിമാനങ്ങൾ ഇറങ്ങുന്നതും ഇവിടെ നിന്നും ദർശിക്കാം. വൈകുന്നേരങ്ങളിൽ ആകാശത്ത് ചായം പൂശുന്ന അസ്തമയ സൂര്യനെ കാണാൻ ദൂരദേശങ്ങളിൽ നിന്ന് പോലും ആളുകൾ ഇവിടെ എത്തുന്നു.
കൂടാതെ, സന്ദർശകരുടെ സൗകര്യത്തിനായി ഇവിടെ മനോഹരമായ പാർക്ക് സംവിധാനവും ഒരുക്കിയിട്ടുണ്ട്. മിസ്റ്റി ലാൻഡ് നാച്ചുറൽ പാർക്ക് എന്നറിയപ്പെടുന്ന ഈ ഭാഗം കുട്ടികൾക്കും കുടുംബങ്ങൾക്കും ഏറെ പ്രിയപ്പെട്ടതാണ്. വിശ്രമിക്കാൻ ഇരിപ്പിടങ്ങൾ, പ്രകൃതിയോട് ചേർന്ന വിനോദ സൗകര്യങ്ങൾ, ഫോട്ടോഗ്രഫിക്ക് അനുയോജ്യമായ ഇടങ്ങൾ എന്നിവ ഇവിടെ ഒരുക്കിയിട്ടുണ്ട്.
എന്നാൽ, സന്ദർശകരുടെ വർധനവിനൊപ്പം വിവിധ പ്രശ്നങ്ങളും ഉയർന്നുവരികയാണ്. ഇടുങ്ങിയ മലനിര റോഡുകൾ കാരണം ഗതാഗത തടസ്സങ്ങൾ പതിവാകുന്നു. ചില സമയങ്ങളിൽ വാഹനങ്ങളുടെ നീണ്ട നിരകൾ രൂപപ്പെടുകയും, അതുവഴി പ്രദേശവാസികൾക്കും യാത്രക്കാർക്കും ബുദ്ധിമുട്ട് അനുഭവപ്പെടുകയും ചെയ്യുന്നു. അടിയന്തരാവസ്ഥകളിൽ ആംബുലൻസ് പോലുള്ള വാഹനങ്ങൾ കടന്നുപോകുന്നതിനും ബുദ്ധിമുട്ടുണ്ടാകുന്നുവെന്ന പരാതികളും ഉയരുന്നുണ്ട്.
കൂടാതെ, മലയിൻ മുകളിലെ സുരക്ഷാ സൗകര്യങ്ങളുടെ കുറവും ശ്രദ്ധേയമാണ്. ആവശ്യമായ സുരക്ഷാ വേലികൾ, നിയന്ത്രിത പാർക്കിംഗ് സൗകര്യങ്ങൾ, ശുചിത്വ സംവിധാനങ്ങൾ എന്നിവയുടെ അഭാവം അപകടസാധ്യത വർധിപ്പിക്കുന്നതായി നാട്ടുകാർ ചൂണ്ടിക്കാട്ടുന്നു. ചില സന്ദർശകർ സുരക്ഷാനിർദേശങ്ങൾ പാലിക്കാതിരുന്നതും പ്രശ്നങ്ങൾക്ക് ഇടയാക്കുന്നുവെന്നാണ് വിവരം.
ഇത്തരം സാഹചര്യങ്ങൾ പരിഗണിച്ച്, സന്ദർശകരുടെ സുരക്ഷ ഉറപ്പാക്കുന്നതിനും ഗതാഗത നിയന്ത്രണം ശക്തിപ്പെടുത്തുന്നതിനുമായി ബന്ധപ്പെട്ട അധികാരികൾ നടപടികൾ ആലോചിച്ചുവരികയാണ്. പോലീസ് നിരീക്ഷണം വർധിപ്പിക്കൽ, പാർക്കിംഗ് നിയന്ത്രണം, പ്രവേശന നിയന്ത്രണങ്ങൾ എന്നിവ ഉൾപ്പെടെയുള്ള നിർദേശങ്ങൾ പരിഗണനയിലാണ്.
പ്രകൃതിസൗന്ദര്യവും വിനോദസഞ്ചാര സാധ്യതകളും കൊണ്ട് ശ്രദ്ധേയമായ മിനി ഊട്ടി, മലപ്പുറം ജില്ലയിലെ പ്രധാന വിനോദസഞ്ചാര കേന്ദ്രമായി തുടരുമ്പോൾ, സുരക്ഷയും സൗകര്യങ്ങളും മെച്ചപ്പെടുത്തേണ്ടത് അത്യാവശ്യമായ കാര്യമായി മാറിയിരിക്കുകയാണ്.
